Cefnogi niwrowahaniaeth: Teclyn digidol newydd yn cael ei lansio yn yr Eisteddfod Genedlaethol

Mae Tîm Awtistiaeth Gwynedd yn galw ar bobl o bob oed i ddod i dreialu Ap newydd sbon ar faes yr Eisteddfod Genedlaethol yn Wrecsam.

Bydd y tîm ar stondin Bwrdd Partneriaeth Rhanbarthol Gogledd Cymru a bydd cyfle i’r cyhoedd alw heibio i brofi'r Ap ‘Niwro Cymru’ ar ddydd Sadwrn 2 Awst a dydd Mawrth 5 Awst, 2025. Bydd hyn yn helpu’r swyddogion i addasu a datblygu’r Ap cyn ei lansio’n llawn ar ôl yr haf.

Mae ‘Niwro Cymru’ yn Ap dwyieithog wedi’i ddatblygu i gefnogi plant a phobl ifanc ac oedolion niwroamrywiol a’u teuluoedd a gweithwyr proffesiynol. Mae’n cynnig gwybodaeth glir a dibynadwy, gweithgareddau hwyliog a lleddfol, manylion digwyddiadau lleol a chymorth yn ogystal a adnoddau i weithwyr proffesiynol.

Fe’i datblygwyd drwy ymgysylltu’n uniongyrchol gyda phobl ifanc Gwynedd a’u teuluoedd, a drwy adborth gwerthfawr a dderbyniwyd o’r Daith Niwro a gynhaliwyd yn gynharach yn y flwyddyn. Defnyddiwyd y syniadau i greu cynnwys, y nodweddion allweddol, a dyluniad logo’r Ap.

Mae’r Ap yn cynnwys nodweddion meddylgar megis:

• Animeiddiad cynnil, adborth haptig a synau nad ydynt yn tarfu
• Cynnwys all-lein er mwyn lleihau costau data i ddefnyddwyr
• Hygyrchedd: Cyferbynnedd, cynllun a 'thestun i leferydd'

Dywedodd y Cynghorydd Menna Trenholme, Aelod Cabinet dros Blant a Chefnogi Teuluoedd Cyngor Gwynedd:

“Mae’r prosiect hwn yn gam ymlaen i gydnabod, dathlu, a chefnogi niwroamrywiaeth ar draws ein cymunedau. Rydym wedi ymrwymo i wella’n darpariaeth yma yng Ngwynedd ac rydym yn ffyddiog y bydd yr Ap yn declyn ychwanegol gwerthfawr i deuluoedd gael mynediad at wybodaeth, gweithgareddau a chefnogaeth.

“Mae’r Ap wedi’i gynllunio gyda phlant dan sylw; o’r dyluniad llachar, tawel a chyfeillgar i’r ffaith ei fod yn hawdd i’w lywio boed chi’n rhieni, gofalwyr, brodyr/chwiorydd neu’n weithwyr proffesiynol.”

Ychwanegodd y Cynghorydd Dilwyn Morgan, Aelod Cabinet dros Oedolion, Iechyd a Llesiant Cyngor Gwynedd a Chadeirydd  Bwrdd Partneriaeth Rhanbarthol Gogledd Cymru:

“Mae’r Bwrdd Partneriaeth Rhanbarthol yn cydweithio’n agos gyda phartneriaid i gefnogi lles pobl ar draws y Gogledd. Rwy’n falch iawn bod y Bwrdd wedi gallu buddsoddi yn y feddalwedd arloesol hon - y gyntaf o’i math yn y maes sydd ar gael yn y Gymraeg ochr yn ochr â’r Saesneg. Mae’r Ap hwn yn adlewyrchu’r dull cydweithredol o gefnogi cynhwysiant digidol a hynny i’r rhai niwroamrywiol.

“Rwy’n edrych ymlaen yn fawr at gyfarfod teuluoedd fydd yn cael cyfle i dreialu’r Ap yn ystod yr Eisteddfod Genedlaethol yn Wrecsam.” 

Am fwy o wybodaeth am waith y Tîm, ewch i dudalen Awtistiaeth ar wefan y Cyngor: www.gwynedd.llyw.cymru/awtistiaeth