Mae ap dwyieithog newydd i ofalwyr di-dâl a’u teuluoedd yng Ngwynedd a Ynys Môn wedi ei lansio mewn digwyddiad arbennig yn Storiel, Bangor.
Mewn partneriaeth gyda Cyngor Sir Ynys Môn a Gwasanaeth Cynnal Gofalwyr mae’r Ap AiDi yn adeiladau ar lwyddiant yr ap presennol sydd ar gael i ofalwyr ifanc, ond sydd bellach yn cynnwys gwybodaeth, cymorth a chyngor i holl ofalwyr di-dal yn ogystal â gweithwyr proffesiynol yn y maes.
Mae rhai o nodweddion yr ap yn cynnwys:
- Gwneud cais am gerdyn gofalwyr
- Cerdyn adnabod digidol
- Pecyn gostyngiadau
- Gwybodaeth am ddigwyddiadau
- Cysylltiadau defnyddiol
- Gwybodaeth ddefnyddiol am lesiant, budd-daliadau a hawliau
Roedd y lansiad yn gyfle i ddysgu mwy am yr ap, clywed gan bartneriaid y prosiect a chael cipolwg ar sut y gall y datblygiad newydd hwn helpu i wella profiadau a chanlyniadau i ofalwyr di-dâl.

Dywedodd y Cynghorydd Dilwyn Morgan, Aelod Cabinet Cyngor Gwynedd dros Oedolion, Iechyd a Llesiant:
Braf iawn oedd cael bod yn y digwyddiad yn Storiel i gydnabod cyfraniad amhrisiadwy gofalwyr di-dâl, codi ymwybyddiaeth o'u rôl, a hyrwyddo mynediad gwell at wybodaeth, cyngor a chymorth.
Mae cefnogi iechyd a lles gofalwyr di-dâl yn holl bwysig i ni yma yng Ngwynedd. Roedd gofalwyr yn dweud wrthym eu bod eisiau teclyn lle fyddai gwybodaeth ar gael mewn un man canolog - rhywbeth a fyddai’n syml, yn lleol, yn gefnogol ac yn ymarferol ac rwyf yn hyderus bod yr ap AiDi yn cynnig hynny.
Mae cydweithio gyda phartneriaid wedi bod yn holl bwysig wrth ddatblygu ac ehangu’r ap, a hoffwn ddiolch i Cyngor Sir Ynys Môn a Gwasanaeth Cynnal Gofalwyr Gogledd Cymru am eu cefnogaeth a chydweithrediad.”
Ychwanegodd Linda Kinani o Wasanaeth Cynnal Gofalwyr:
“Mae'r ap newydd hwn yn enghraifft wych o'r hyn y gallwn ei gyflawni drwy gydweithio, ac rydym yn falch o fod wedi bod yn rhan o'i ddatblygiad o'r cychwyn cyntaf er mwyn sicrhau y gall gofalwyr di-dâl ledled Gwynedd, Môn a Conwy gael mynediad at wybodaeth, cyngor a chymorth yn rhwydd."
Gellir lawrlwytho’r Ap am ddim ar eich ffôn clyfar neu lechen.