Uchelgais Gogledd Cymru yn penodi Prif Weithredwr

Datganiad ar ran Uchelgais Gogledd Cymru

Mae Alwen Williams wedi'i phenodi'n Brif Weithredwr Cyd-bwyllgor Corfforedig y Gogledd – a elwir yn Uchelgais Gogledd Cymru.

Mae'r penodiad yn dilyn pum mlynedd pan fu Alwen yn arwain ar gyflawni Cynllun Twf y rhanbarth fel Cyfarwyddwr Portffolio yn Uchelgais Gogledd Cymru – rôl y mae hi wedi'i chyfuno'n fwy diweddar â rôl Prif Weithredwr rhan-amser dros dro y CBC.

Mae'r Cyd-bwyllgor Corfforedig yn sefydliad llywodraeth leol rhanbarthol newydd, a grëwyd gan Lywodraeth Cymru, gyda chyfrifoldeb statudol i gynhyrchu cynllun trafnidiaeth rhanbarthol a chynllun datblygu strategol rhanbarthol yn ogystal â dyletswydd i wella a hyrwyddo lles economaidd rhanbarthol. 

Arweiniodd y cyfrifoldebau ychwanegol hyn o fewn cylch gwaith Uchelgais Gogledd Cymru, at greu rôl lawn amser y Prif Weithredwr. Bydd Alwen nawr yn arwain y CBC sydd hefyd yn golygu ei bod yn parhau i arwain ar gyflawni Cynllun Twf Gogledd Cymru a chydweithio â phartneriaid i gyflawni Parth Buddsoddi Sir y Fflint a Wrecsam.

Dywedodd Alwen Williams, Prif Weithredwr, Uchelgais Gogledd Cymru: "Rwy'n falch iawn o gael fy mhenodi i'r rôl gyffrous hon ar sail barhaol a llawn amser. Mae Gogledd Cymru yn gartref i mi ac yn lle sy'n agos iawn at fy nghalon. Mae'n fraint gwirioneddol cael bod mewn rôl sy'n cyfrannu'n uniongyrchol tuag at ddyfodol ffyniannus i'n rhanbarth."

Dywedodd y Cynghorydd Mark Pritchard, Cadeirydd, Uchelgais Gogledd Cymru ac Arweinydd, Cyngor Bwrdeistref Sirol Wrecsam:
"Mae rôl y Prif Weithredwr yn hanfodol i ddatblygiad y Gogledd fel rhanbarth ac i sicrhau y gallwn ddangos ein gwerth ar lwyfan cenedlaethol a hyd yn oed byd-eang. Mae'r cyfrifoldebau sydd bellach yn eistedd o fewn Uchelgais Gogledd Cymru fel Cyd-bwyllgor Corfforedig y rhanbarth yn helaeth ac mae angen arweinyddiaeth eithriadol i'w cyflawni. Rôl Alwen nawr yw cyflawni dros Ogledd Cymru a symud y rhanbarth ymlaen i'r dyfodol."

Dywedodd y Cynghorydd Charlie McCoubrey, Is-gadeirydd, Uchelgais Gogledd Cymru ac Arweinydd, Cyngor Bwrdeistref Sirol Conwy: 
"Mae Alwen yn arweinydd eithriadol sydd â'r sgiliau i sicrhau bod Uchelgais Gogledd Cymru yn parhau i gyflawni ar gyfer y rhanbarth. Mae'r hyn y mae hi wedi'i gyflawni dros y pum mlynedd diwethaf wedi dangos ei gallu i ddod â phartneriaid ledled y rhanbarth ynghyd gyda gweledigaeth glir sy'n canolbwyntio ar wella lles economaidd, cymdeithasol ac amgylcheddol y Gogledd."

Cyn ymuno ag Uchelgais Gogledd Cymru yn 2019, cafodd Alwen yrfa 24 mlynedd gyda BT plc a'r darparwr seilwaith Openreach Ltd mewn ystod o wahanol rolau arweinyddiaeth strategol a gweithredol. Ar ôl treulio blynyddoedd yn gweithio yn Llundain a Chaerdydd, dychwelodd 'gartref' gan iddi gael ei magu yng Ngwytherin, ger Llangernyw a mynychu Ysgol Dyffryn Conwy, Llanrwst.

Mae gan Alwen MSc mewn Systems Thinking a BA dosbarth cyntaf (anrh) mewn Arweinyddiaeth a Rheolaeth drwy'r Brifysgol Agored, a thystysgrif mewn Cymell Gweithredol o Ashridge Hult Business School. Am ei chyfraniad i fusnes yn ystod ei gyrfa ym maes telathrebu, dyfarnwyd cymrodoriaethau er anrhydedd i Alwen gan Brifysgol Cymru y Drindod Dewi Sant a Phrifysgol Wrecsam. 

Ar hyn o bryd, mae Alwen yn byw yn yr Wyddgrug, gyda'i gŵr Damian ac yn ei hamser hamdden mae'n aelod o bwyllgor datblygu King's Trust Cymru ac yn ymddiriedolwr Sefydliad Chwaraeon Cymru, elusen genedlaethol sydd wedi ymrwymo i gael gwared ar rwystrau ariannol i chwaraeon a gweithgarwch corfforol i blant a phobl ifanc.

Am ragor o wybodaeth:  

Bethan Angharad Airey:  BethanAngharadAirey@uchelgaisgogledd.cymru / 07385 223271 

Nodiadau i olygyddion: 

• Mae Cyd-bwyllgor Corfforedig y Gogledd yn cynnwys chwe awdurdod lleol y rhanbarth ac Awdurdod Parc Cenedlaethol Eryri.  
• Mae'r Cyd-bwyllgor Corfforedig wedi cytuno i fabwysiadu brand Uchelgais Gogledd Cymru.
• Mae Cynllun Twf Gogledd Cymru yn fuddsoddiad o £1 biliwn i economi'r rhanbarth, ac mae £240m ohono'n cael ei ariannu gan Lywodraeth Cymru a Llywodraeth y DU.
• Ar 1 Ebrill 2025, cafodd y Swyddfa Rheoli Portffolio a Chynllun Twf Gogledd Cymru eu trosglwyddo i Gyd-bwyllgor Corfforedig y Gogledd. 
• Mae'r Is-bwyllgor Lles Economaidd, sy'n cymeradwyo achosion busnes y Cynllun Twf, yn is-bwyllgor o Gyd-bwyllgor Corfforedig y Gogledd.
• Am ragor o wybodaeth am Uchelgais Gogledd Cymru a gwybodaeth llywodraethu, ewch i Uchelgais Gogledd Cymru | Cartref.