Thema 3: Hyfforddiant a Pholisïau

 

Beth mae adroddiad Cyfiawnder drwy ein Dewrder yn ei ddweud?

(Hon ydi’r adroddiad gafodd ei chyhoeddi yn dilyn ymchwiliad Bwrdd Diogelu Gogledd Cymru i droseddau y cyn-bennaeth. (Gweld yr adroddiad)

• Nid oedd y Person Diogelu Dynodedig yr ysgol lle gwnaeth y  cyn-Brifathro droseddu wedi derbyn hyfforddiant diogelu addas.  (Y Person Diogelu  Dynodedig ydi’r person sydd wedi’i benodi i fod yn gyfrifol am faterion diogelu mewn ysgol).
• Nid oedd Llywodraethwyr a staff yr ysgol wedi derbyn hyfforddiant diogelu addas.
• Nid oedd staff Cyngor Gwynedd na staff yr Ysgol yn gwybod pryd a sut i gyflwyno pryder (trefn sy’n cael eu hadnabod fel “Canu'r Gloch”).

 

Beth sydd wedi ei wneud i wella pethau

• Mae Cyngor Gwynedd wedi cynnwys gwybodaeth am feithrin perthnasoedd amhriodol (“grooming”) yn y pecyn hyfforddiant i bob ysgol ar ddechrau’r flwyddyn ysgol (Medi 2025).
• Mae gweithiwr wedi cael ei benodi i godi ymwybyddiaeth o’r maes diogelu ar draws y Cyngor a rhoi gwybod am yr hyfforddiant diogelu sydd ar gael i staff.
• Mae pob adran o fewn Cyngor Gwynedd yn gwirio faint o staff sydd wedi mynychu hyfforddiant Diogelu, ac hyfforddiant ar Drais yn erbyn Merched, Cam-drin Domestig a Thrais Rhywiol. Mae hyn bellach yn cael ei fonitro yn y cyfarfodydd perfformiad rheolaidd. 

• Mae’r Cyngor wedi creu fideo ar gyfer cyflwyno’r hyfforddiant diogelu i staff sy’n gweithio yn y maes, er enghraifft, gweithwyr ar y loriau bin, glanhawyr ac ati. 

• Mae’r Cyngor wedi prynu hyfforddiant arbenigol gan yr NSPCC i helpu staff sy'n gweithio â phlant adnabod newid mewn ymddygiad plentyn a allai fod yn arwydd o feithrin berthynas amhriodol (“grooming”) neu gam-driniaeth.  

• Mae’r NSPCC hefyd yn creu hyfforddiant cyffredinol ar-lein i holl aelodau staff ar adnabod arwyddion o gam-driniaeth a “grooming”. 

• Mae’r Cyngor wedi mabwysiadu polisi cyflwyno pryder (Polisi “Canu’r Gloch”) a gwneud mwy o waith i godi ymwybyddiaeth staff ar draws y Cyngor. 

Beth fydd Cyngor Gwynedd yn ei wneud rhwng mis Ionawr 2026 a mis Gorffennaf 2026?

Bydd Cyngor Gwynedd yn: 

• Cyflwyno Polisi a Chanllaw Cyflwyno Pryder (Polisi “Canu’r Gloch”) ar gyfer Cynghorwyr Gwynedd.
• Cyflwyno hyfforddiant ar y Polisi a Chanllaw Cyflwyno Pryder (Polisi “Canu’r Gloch”) ar gyfer holl staff a Chynghorwyr Gwynedd.
• Cyflwyno hyfforddiant cadw cofnodion diogelu.
• Bydd aelodau Pwyllgorau Craffu’r Cyngor (grŵp o gynghorwyr sy’n gwirio bod y Cyngor yn gwneud pethau’n iawn) yn gorffen ymchwilio i drefniadau diogelu mewn ysgolion. 

Beth fydd Cyngor Gwynedd yn ei wneud erbyn mis Chwefror 2027

Bydd Cyngor Gwynedd wedi:

• Mapio’r lefel briodol o hyfforddiant diogelu i bob swydd fel bod y rhai sydd ei angen yn cael hyfforddiant uwch. 
• Gwneud yn siŵr bod pob aelod newydd o staff yn derbyn hyfforddiant diogelu yn amserol ar ddechrau eu swydd.
• Derbyn canlyniad yr ymchwiliad gan aelodau Pwyllgorau Craffu a llunio cynllun i weithredu ar unrhyw argymhellion.
• Adolygu a cyflwyno Polisi Diogelu Corfforaethol newydd ar gyfer y Cyngor. 

Sut fydd Cyngor Gwynedd yn mesur effaith y newidiadau

• Bod pob aelod o staff sydd angen Tystysgrif DBS ar gyfer eu swydd efo Tystysgrif DBS gyfredol. (Tystysgrif DBS ydi’r archwiliad i wirio os ydi person yn ddiogel i weithio gyda phlant neu bobl bregus)
• Adrodd ar nifer y staff sydd wedi cwblhau’r hyfforddiant Diogelu a’r hyfforddiant Trais yn erbyn Menywod, Cam-drin Domestig a Thrais Rhywiol.
• Bod pob ysgol yn derbyn ymweliad gan y Tîm Diogelu a Llesiant Ysgolion, a nifer yr ysgolion sydd yn dilyn polisïau diogelu’r Cyngor.
  
  

Yn ôl i brif dudalen Bwrdd Rhaglen Cynllun Ymateb