Cyngor Gwynedd yn cadarnhau penodiad Crwner newydd

Mae’n bleser gan Gyngor Gwynedd gyhoeddi penodiad Kate Robertson (Sutherland gynt) fel Uwch Grwner Ei Mawrhydi ar gyfer Gogledd Orllewin Cymru, fydd yn gwasanaethu siroedd Gwynedd a Môn.

Mae Kate Robertson wedi bod yn gwasanaethu fel Uwch Grwner Dros Dro ers mis Rhagfyr 2020, yn dilyn ymddeoliad Dewi Pritchard Jones. Daw â chyfoeth o brofiad a chysylltiad dwfn â’r gymuned leol gyda hi.

Yn ogystal, mae ei phenodiad yn garreg filltir arwyddocaol fel y siaradwr Cymraeg fenywaidd gyntaf i ymgymryd â rôl Uwch Grwner yng Nghymru.

Gyda chefndir mewn cyfraith ymgyfreitha, daw Kate Robertson â ystod eang o wybodaeth ac arbenigedd i'r swydd. Cafodd ei geni a'i magu yng Ngogledd Cymru, cyn astudio'r gyfraith (LLB) ym Mhrifysgol Caerlŷr a Choleg y Gyfraith yn Guildford ac yna hyfforddi yn Hampshire. Ar ôl dychwelyd i ogledd Gymru, bu’n gweithio mewn cwmni cyfreithiol lleol ble daeth i fod yn un o’r cyfarwyddwyr benywaidd cyntaf.

Mae profiad proffesiynol Kate Robertson yn ymestyn y tu hwnt i’w rôl fel cyfreithiwr a chrwner wrth iddi ddarparu hyfforddiant ac arbenigedd i sefydliadau fel y GIG, meddygon teulu a’r Heddlu. Mae hi wedi cyhoeddi sawl Adroddiadau Atal Marwolaethau, gan gyfrannu at wella adrannau’r llywodraeth, y GIG, a chynghorau lleol yn eu hymdrechion i atal digwyddiadau trasig.

Mae Kate Robertson yn gwasanaethu fel aelod o Bwyllgor Sefydlog yr Arglwydd Ganghellor ar yr Iaith Gymraeg a’r Grŵp Adolygu Gwenwyn Cyffuriau Angheuol. Ar ben hynny, mae’n gadeirydd cyrff llywodraethu dwy ysgol.

Dywedodd Kate Robertson: “Mae’n anrhydedd cael fy mhenodi i’r rôl arwyddocaol hon, ac edrychaf ymlaen at wasanaethu’r rhanbarth. Rwy’n dychmygu na fydd y rhan fwyaf o bobl byth yn dod i gysylltiad â Swyddfa’r Crwner, ond mae’n parhau i fod yn rôl hollbwysig o fewn y farnwriaeth. Rwy’n gobeithio dod â’m profiad o rolau cyfreithiol blaenorol i’r swydd hon o fewn gwasanaethau cyhoeddus.

“Hoffwn dalu teyrnged i’m rhagflaenydd, Dewi Pritchard Jones, a wasanaethodd y gymuned hon am gymaint o flynyddoedd.”

Ychwanegodd Dafydd Gibbard, Prif Weithredwr Cyngor Gwynedd: “Ar ran y Cyngor, hoffwn longyfarch Kate ar ei phenodiad yn Uwch Grwner Ei Mawrhydi ar gyfer Gogledd Orllewin Cymru.

“Gyda’i chysylltiadau lleol, profiad helaeth, ac arwyddocâd hanesyddol bod y Gymraes gyntaf i ddal y swydd hon, gwn y bydd yn parhau i wasanaethu’r gymuned gydag ymroddiad a thegwch.”