Mae Cyngor Gwynedd yn annog pobl sydd â chyflyrau meddygol neu sy’n fregus i fod yn rhan o gynllun cenedlaethol a allai arbed amser hanfodol mewn argyfwng.
Mae’r Cyngor yn cydweithio gyda partneriaid lleol i hyrwyddo’r cynllun ‘Neges mewn Potel’ – sef ffordd o gadw manylion personol a meddygol allweddol lle mae’r gwasanaethau brys yn gwybod i edrych amdano mewn argyfwng.
Sefydlwyd y cynllun gan Lions Clubs International British Isles, ac mae’n cynnwys ffurflen i gofnodi manylion megis alergeddau, cyflyrau iechyd, meddyginiaeth, a chysylltiadau brys. Mae’r cyfan yn cael ei gadw’n ddiogel mewn potel fach gyda chroes werdd arni yn yr oergell.
Mae sticeri â chroes werdd hefyd yn cael eu darparu i’w harddangos yn y cartref, gan dynnu sylw’r gwasanaethau brys at bresenoldeb y botel.
Os bydd angen triniaeth yn yr ysbyty, gellir trosglwyddo’r ‘Neges mewn Potel’ i staff yn yr ysbyty.
Mae Cyngor Gwynedd yn barod wedi dechrau dosbarthu poteli i drigolion sy’n derbyn gwasanaethau gofal neu deleofal gan y Cyngor. Mae poteli hefyd ar gael yn rhad ac am ddim yn y dair Siop Gwynedd (Caernarfon, Dolgellau, Pwllheli) neu Llyfrgelloedd Gwynedd.
Dywedodd y Cynghorydd Dilwyn Morgan, Aelod Cabinet Cyngor Gwynedd dros Oedolion, Iechyd a Llesiant:
Mae’r cynllun yn ffordd syml ond hynod effeithiol o sicrhau bod gwybodaeth hanfodol ar gael i’r gwasanaethau brys. Gall wneud gwahaniaeth mawr mewn argyfwng, gan roi tawelwch meddwl i unigolion a’r rhai sy’n goflau amdanynt.
Dwi’n falch iawn ein bod wedi derbyn nawdd gan y Gronfa Integreiddio Rhanbarthol Iechyd a Gofal Cymdeithasol ar gyfer cynllun pwysig fel yma a fydd yn gwneud gwahaniaeth i drigolion Gwynedd a’u teuluoedd.”
Os ydych chi’n rhywun sy'n darparu neu'n bwriadu darparu gofal di-dâl i oedolyn neu blentyn anabl - boed yn aelod o’r teulu, cymar neu ffrind cofiwch fod cerdyn adnabod ar gael.
Mae Gwasanaeth Cynnal Gofalwyr yn darparu cymorth a chefnogaeth amrywiol i ofalwyr di-dâl yng Ngwynedd.
Cofrestrwch gyda’r Gwasanaeth i gael eich cerdyn gofalwyr a mynediad at wybodaeth a chefnogaeth bellach.