Cronfa Croeso Cynnes a Chymorth Gwynedd

Mae gweithgareddau Croeso Cynnes yn gallu cyrraedd pobl na fyddent o reidrwydd yn cysylltu’n uniongyrchol â gwasanaeth ffurfiol i ofyn am gymorth.

Mae hyn yn creu cyfle i rannu gwybodaeth am gymorth sydd ar gael a helpu pobl i gael cymorth yn gynharach.

Gallai hyn gynnwys gwybodaeth neu gymorth ynghylch:

• costau byw;
• budd-daliadau ac incwm;
• biliau ynni;
• cyngor ariannol neu ddyled;
• iechyd a lles;
• cymorth digidol;
• gwasanaethau’r Cyngor;
• cymorth i deuluoedd;
• gwasanaethau trydydd sector; neu
• weithgareddau a gwasanaethau lleol eraill.

Nid oes disgwyl i grwpiau ddod yn arbenigwyr yn y meysydd hyn.

Gall y cyfraniad fod mor syml â:

• rhannu gwybodaeth gyfredol;
• rhoi gwybod i bobl ble gallent fynd am gymorth;
• helpu rhywun i ddod o hyd i wybodaeth;
• cyfeirio rhywun at wasanaeth perthnasol;
• gwahodd sefydliad neu wasanaeth i ymweld â sesiwn o bryd i’w gilydd; neu
• gynnal sesiwn wybodaeth neu gymorth ymarferol.

Gall sefydliadau wneud cais am grant o rhwng £250 a £2,000.

Nid oes disgwyl i bob cynllun wneud cais am yr uchafswm. Dylai’r swm y gofynnir amdano fod yn gymesur â:

• maint y gweithgaredd;
• pa mor aml y cynhelir y gweithgaredd;
• nifer y sesiynau a gynigir;
• hyd y cyfnod y bydd y gweithgaredd yn rhedeg;
• nifer y bobl y disgwylir iddynt elwa;
• yr angen lleol; a
• chostau gwirioneddol darparu’r gweithgaredd.

Bydd grantiau tuag at ben uchaf yr ystod - hyd at £2,000 - fel arfer yn cael eu blaenoriaethu ar gyfer darpariaeth reolaidd, megis gweithgaredd wythnosol, neu gynllun sy’n gallu dangos lefel debyg o weithgarwch, cyrhaeddiad neu angen.

Byddwn yn disgwyl i gais am grant tuag at yr uchafswm ddangos lefel briodol o weithgarwch a gwerth am arian.

Gall gweithgareddau sy’n digwydd yn llai aml, gan gynnwys gweithgareddau bob pythefnos neu’n fisol, barhau i gael eu cefnogi, ond dylai lefel y cais adlewyrchu maint ac amlder y ddarpariaeth.

Ni fydd nifer y sesiynau yn unig yn penderfynu ar lefel y grant. Gall y Panel hefyd ystyried amgylchiadau lleol, gan gynnwys cymunedau gwledig neu anghysbell lle gall gweithgaredd llai aml chwarae rhan arbennig o bwysig.

Gall y Gronfa gyfrannu at gostau uniongyrchol darparu gweithgaredd Croeso Cynnes.

Gallai hyn gynnwys:

• costau gwresogi a goleuo sy’n gysylltiedig â’r gweithgaredd;
• diodydd poeth a lluniaeth ysgafn rhesymol;
• costau gweithgareddau;
• deunyddiau;
• costau llogi lleoliad;
• costau rhesymol sy’n helpu i wneud y gweithgaredd yn hygyrch;
• costau gwirfoddolwyr lle bo hynny’n briodol; a
• chostau eraill sydd â chysylltiad uniongyrchol â darparu’r gweithgaredd.

Bydd angen darparu tystiolaeth briodol o wariant.

Ni fydd y Gronfa fel arfer yn ariannu:

• gweithgaredd masnachol neu weithgaredd sydd wedi’i gynllunio i greu elw
• costau craidd sefydliad lle nad oes cysylltiad clir rhyngddynt a’r gweithgaredd croeso cynnes
• gweithgaredd sydd eisoes wedi’i ariannu’n llawn o ffynhonnell arall
• gweithgaredd sydd wedi’i gyfyngu i aelodau sefydliad neu grŵp penodol yn unig
• cynllun sy’n dyblygu darpariaeth leol heb dystiolaeth o angen ychwanegol
• costau nad oes modd darparu tystiolaeth briodol ar eu cyfer
• gweithgaredd nad yw ar gael i’r gymuned mewn ffordd agored a cynhwysol

Gall sefydliadau di-elw wneud cais, gan gynnwys:

• elusennau;
• grwpiau cymunedol a gwirfoddol cyfansoddedig;
• neuaddau pentref a chanolfannau cymunedol;
• mentrau cymdeithasol;
• Cwmnïau Budd Cymunedol lle nad oes budd masnachol yn deillio o’r gweithgaredd;
• sefydliadau ffydd sy’n darparu gweithgaredd agored a chynhwysol i’r gymuned; a
• sefydliadau dielw tebyg
• Cynghorau cymuned a thref

Rhaid i’r gweithgaredd a ariennir fod yn agored ac yn gynhwysol ac ni ddylai fod wedi’i gyfyngu i aelodau presennol sefydliad yn unig.

Bydd disgwyl i gynlluniau a ariennir fod yn barod i:

• ddarparu gweithgaredd lleol croesawgar a chynhwysol;

• gadw mewn cysylltiad â Swyddog Cefnogi Cymunedau a rhwydweithiau lleol perthnasol;

• rhannu gwybodaeth berthnasol gyda’r bobl sy’n defnyddio eu gweithgaredd;

• hyrwyddo gwybodaeth am gostau byw a chymorth ataliol lle bo hynny’n berthnasol;

• gwybod ble i gyfeirio pobl sydd angen cymorth pellach;

• croesawu cyfleoedd rhesymol i wasanaethau neu sefydliadau partner gysylltu â’r grŵp;

• hyrwyddo eu gweithgaredd drwy rwydweithiau lleol; a

• sicrhau bod gwybodaeth am eu gweithgaredd ar gael ar Dewis Cymru lle bo hynny’n briodol.

Dylai’r disgwyliadau fod yn gymesur â maint a natur y gweithgaredd. Nid oes disgwyl yr un peth gan grŵp bach mewn neuadd bentref ag sydd gan sefydliad mwy sy’n darparu nifer o sesiynau bob wythnos.

Wrth asesu ceisiadau byddwn yn edrych ar:

Angen lleol

A oes angen clir am y gweithgaredd yn y gymuned?

Cysylltiad cymdeithasol

A yw’r gweithgaredd yn rhoi cyfle gwirioneddol i bobl ddod at ei gilydd ac yn helpu i leihau unigrwydd neu unigedd?

Amlder a chyrhaeddiad

Pa mor aml fydd y gweithgaredd yn digwydd, am faint o amser, a faint o bobl y disgwylir iddynt elwa?

Hygyrchedd

A yw’r gweithgaredd yn hygyrch i’r gymuned, gan gynnwys pobl mewn ardaloedd gwledig neu anghysbell?

Cysylltu â gwybodaeth a chymorth

A yw’r grŵp yn barod i helpu i sicrhau bod gwybodaeth am gostau byw, cymorth ataliol a gwasanaethau perthnasol yn cyrraedd y bobl sy’n defnyddio’r gweithgaredd?

Cysylltiadau lleol

A yw’r cynllun yn barod i fod yn rhan o’r rhwydwaith lleol o grwpiau, llyfrgelloedd, hybiau, gwasanaethau a phartneriaid?

Gwerth am arian

A yw lefel y grant y gofynnir amdano yn rhesymol o ystyried amlder, maint, cost a chyrhaeddiad y gweithgaredd?

Rydym am weld gweithgareddau Croeso Cynnes a Chymorth Gwynedd fel rhan o rwydwaith ehangach o gymorth lleol.

Gall llyfrgelloedd a hybiau cymunedol weithredu fel sefydliadau angor lleol, gan helpu i gysylltu trigolion, grwpiau cymunedol, gwasanaethau’r Cyngor a sefydliadau partner.

Nid yw hyn yn golygu bod rhaid i bob gweithgaredd ddigwydd mewn llyfrgell neu hwb.

Mae gweithgareddau mewn neuaddau pentref, canolfannau cymunedol a lleoliadau lleol eraill yn rhan hanfodol o’r rhwydwaith hwn - yn enwedig mewn cymunedau gwledig lle gall pellter a diffyg trafnidiaeth greu rhwystrau ychwanegol.

Y nod yw sicrhau bod gweithgareddau cymunedol lleol yn dod â phobl ynghyd, gan sicrhau bod gwybodaeth a chymorth yn cyrraedd trigolion yn eu cymunedau, a'u galluogi i gael mynediad at gymorth ychwanegol pan fo angen.

Nid disgwyl i bawb ddod i un lleoliad yw’r nod - ond defnyddio’r rhwydwaith lleol sydd eisoes yn bodoli i ddod â chymorth yn nes at bobl.