Eisiau gwybod mwy am gynlluniau tai Cyngor Gwynedd a’i bartneriaid? Eisiau gwybod pa help sydd ar gael i ddod o hyd i gartref addas? Dewch i ymuno â ni am un o’n sesiynau ‘Tai ar Daith’.
Pwrpas y digwyddiadau yma yw codi ymwybyddiaeth am y cynlluniau tai sydd ar gael i sicrhau bod gan bobl fynediad at gartrefi addas o safon, sy’n fforddiadwy ac sy’n gwella eu hansawdd bywyd.
Beth yw Tai ar Daith?
Mae digwyddiadau Tai ar Daith yn cael eu trefnu gan Gyngor Gwynedd ac maen nhw’n cael eu cynnal eleni ym Mhlaenau Ffestiniog, Botwnnog, y Bala a Bangor. Yn y sesiynau galw-i-mewn anffurfiol yma, gall unrhyw un ddod i ofyn cwestiynau a thrafod materion yn uniongyrchol gyda swyddogion tai arbenigol.
Galwch draw i:
gyfarfod wyneb yn wyneb â swyddogion y Cyngor a’i bartneriaid i drafod eich anghenion penodol – os oes angen help arnoch i lenwi ffurflen gais am dŷ cymdeithasol neu os ydych chi eisiau trafod cynlluniau tai cyffredinol y Cyngor, rydym yma i helpu.
ddysgu mwy am y cynlluniau tai sydd ar gael i’ch helpu chi drwy Gynllun Gweithredu Tai’r Cyngor, gan gynnwys ein rhaglen adeiladu tai ‘Tŷ Gwynedd’, grantiau tai gwag a benthyciadau i brynu cartref.
ddeall yn union beth mae’r Cyngor a’i bartneriaid yn ei wneud i gynyddu’r cyflenwad tai i bobl leol, sicrhau nad oes neb yn ddigartref yng Ngwynedd a mynd i’r afael â’r argyfwng costau byw.
gael mynediad at gyfoeth o adnoddau a chyngor arbenigol sy’n ymwneud â’r maes tai.
Mae timau ar draws adrannau’r Cyngor am fod yn bresennol, gan gynnwys:
Prosiectau tai’r Cyngor – dewch i ddysgu mwy am y cynlluniau sydd ar gael gan y Cyngor i'ch helpu i gael hyd i gartref.
Swyddogion Siop un Stop tai – eisiau cyngor a chefnogaeth gyda’r broses o ymgeisio am dŷ cymdeithasol neu tŷ fforddiadwy gan swyddogion profiadol? Bydd y tîm Siop un Stop tai yno i helpu.
Digartrefedd – cefnogaeth i unrhyw un sy’n profi digartrefedd neu sydd mewn perygl o ddod yn ddigartref yng Ngwynedd, o gyngor i aros yn eich cartref, i gyflwyno’n ddigartref i’r Cyngor.
Cyngor ynni – mae llawer iawn o gynlluniau ar gael i’ch helpu i gadw eich cartref yn gynnes ac ynni-effeithlon. Bydd ein Cynghorwyr Ynni wrth law i drafod opsiynau a'ch helpu i ddod o hyd i'r gefnogaeth gywir.
Cymorth costau byw –os ydych yn cael trafferth gyda chostau o ddydd i ddydd, bydd cymorth ar gael gan swyddogion i helpu efo biliau, bwyd a chostau eraill sy’n gysylltiedig efo’r cartref.
Bydd cymdeithasau tai Gwynedd hefyd yn bresennol, ynghyd â phartneriaid eraill sy’n ymwneud â phrosiectau tai’r Cyngor.
Mae digwyddiadau Tai ar Daith yn agored i bawb. P'un a ydych angen cartref neu eisiau gwybod mwy am gynlluniau tai yn y Sir, dewch i ymuno â ni.
