SOS #Galw Gofalwyr

Mae nifer o wasanaethau a rolau gwahanol ar gael ar hyd a lled Gwynedd, gyda chyfle i ymuno â thîm sydd am wneud y gorau i bobl Gwynedd. Byddwch yn helpu pobl i fyw eu bywyd fel maen nhw’n dymuno ei fyw.

Ein gwasanaeth Gofal Cartref
Drwy gefnogi pobl yn eu cartrefi eu hunain byddwch yn eu helpu i fyw bywyd i’r eithaf, a bod mor annibynnol a hapus â phosib o fewn eu cymuned. Gallai hyn olygu helpu gyda gofal personol, helpu i wneud bwyd, sgwrsio a deall eu cryfderau. Mae’n bwysig dod i ddeall be sy’n bwysig i’r person hwnnw, a gweithio gydag eraill yn y gymuned i’w helpu i gyflawni hynny.

Ein Gwasanaeth Anableddau Dysgu
Byddwch yn helpu oedolion o bob oed i fod yn byw bywyd llawn ac actif yn eu cartrefi a’u cymunedau eu hunain, gan ddod i adnabod y bobl, a deall be sy’n bwysig iddynt ac yn eu gwneud yn hapus.

Ein cartrefi preswyl
Mae gan y Cyngor 11 o gartrefi preswyl ar gyfer pobl hyn a 2 ar gyfer oedolion gydag anableddau dysgu.
Mae’r staff ymhob cartref yn cefnogi’r trigolion i fyw eu bywydau gyda'r ethos 'fel petaent yn byw gartref'. Byddwch yn dod i adnabod y preswylwyr a’u teuluoedd ac yn helpu i sicrhau eu bod yn cael byw bywyd mor llawn â phosib mewn awyrgylch diogel a chartrefol.
Byddwch yn dod i ddeall be sy’n bwysig i bob unigolyn, gan ymdrechu i gadw a chynnal urddas, annibyniaeth a phreifatrwydd yr holl unigolion mewn awyrgylch cynnes a gofalgar, a bod yn sensitif i’r ffordd y gall anghenion newid ac addasu.
Gall hyn olygu gwneud gwahanol weithgareddau, mynd ar dripiau yn ogystal â darparu gofal personol, sgwrsio a chadw cwmni.

Gofal Dydd
Byddwch yn cefnogi unigolion mewn canolfannau penodol i gymdeithasu, gwneud ffrindiau a mwynhau gweithgareddau. Weithiau, yn ôl yr angen, caiff pryd a pheth gofal ei gynnwys. Mae’r gwasanaeth yma wedi ei ohirio dros dro oherwydd yr argyfwng.

Oes gennych chi yr awydd i helpu a gwneud gwahaniaeth yn eich cymuned yna mae cyfle i chi o fewn y gwasanaeth gofal i oedolion.

Mae Cyngor Gwynedd yn cynnig hyfforddiant, telerau gwaith da ac oriau cyson, a’r cyfle i helpu trigolion bregus y sir i fyw bywydau mor llawn â phosib.

• Gweithwyr Gofal ­- Nid oes angen unrhyw gymwysterau ffurfiol, dim ond calon i helpu! Mae’r rôl yma’n cynnwys gweithio a chefnogi pobl i fedru cyflawni’r pethau sy’n bwysig iddynt, a byw bywyd mor annibynnol a hapus â phosib. Gallai hynny olygu helpu pobl gyda phob agwedd o fywyd pob dydd, cadw cofnod o’r gwaith, trafod a chydlynu gyda theuluoedd, gofalwyr aelodau’r gymuned a gweithwyr eraill sy’n rhan o rwydwaith cefnogol yr unigolyn.

• Rheolaeth a gweinyddu - Mae rheolwyr a staff gweinyddol yn gweithio’n agos i gydlynu’r gwasanaethau o ddydd i ddydd. Mae darparu gwasanaethau o ansawdd uchel, sy’n canolbwyntio ar beth sy’n bwysig i’r unigolyn wrth wraidd y gwaith.

• Arlwyo - Mae gweithwyr arlwyo yn gwneud yn siŵr fod pobl yn derbyn prydau maethlon blasus, gan weithio law yn llaw â’r preswylwyr ac ystyried pa fath o ddiet sy’n fwyaf addas iddynt.
• Gadw tŷ a chynnal a chadw – Mae’r rolau yma’n bwysig er mwyn sicrhau amgylchedd glan, diogel a chyfforddus i drigolion, ymwelwyr a staff.

Mae gwaith gofal yn cynnig yn llawer mwy na gofal personol yn unig. Mae cyfle i chi rannu eich diddordebau, a helpu pobl i wella, datblygu neu ail-gydio mewn sgiliau fydd yn eu helpu i fyw bywyd mwy annibynnol a bodlon.

Mae Cyngor Gwynedd yn cynnig …

• Swyddi gyda cytundebau shifftiau amrywiol llawn neu ran amser yn eich ardal chi
• Cyflog uwch na graddfa "cyflog byw"
• D.B.S am ddim
• Cofrestriad proffesiynol am ddim
• Cyflwyniad i’ch paratoi i weithio a hyfforddiant am ddim
• Os ydych yn newid gyrfa rydym yn cynnig cefnogaeth ymarferol i’ch helpu i ddefnyddio eich sgiliau mewn ffyrdd gwahanol
• Pensiwn gwaith da
• Cynllun buddiannau staff
• Gwyliau yn cychwyn o 24.5 dydd pro rata
• Cefnogaeth rheolwr profiadol , cydweithwyr a chydweithwyr o adrannau eraill megis iechyd a diogelwch, iechyd galwedigaethol a chwnsela
• Offer ac adnoddau i’ch cefnogi a’ch cadw yn saff gan gynnwys cyflenwad personol o offer amddiffynnol addas menig masgiau ffedog … am ddim
• Cyfleon datblygu parhaus i ddatblygu eich gyrfa o fewn y maes. Cyfle i ennill cymwysterau wrth fynd, oll wedi’u hariannu gan y Cyngor.

Mae Academi Gofal Gwynedd yn gyfle gwych i chi ddatblygu eich gyrfa yn y maes Gofal drwy weithio gyda phobl brofiadol, derbyn cymwysterau a chael cyflog yr un pryd!

Gyda llwybrau amrywiol drwy'r Academi Gofal, p'un a ydych yn chwilio am rôl mewn Rheoli Gofal, dod yn Weithiwr Cymdeithasol neu'n Therapydd Galwedigaethol, mae posibilrwydd datblygu drwy’r academi i rôl sy'n addas i chi. Mae’r sector bob amser angen aelodau tîm brwdfrydig i gefnogi pobl ledled Gwynedd.

Mae’r cynllun yn gyfle unigryw i unrhyw un ddatblygu gyrfa yn y sector Gofal yng Nghyngor Gwynedd. Byddwch yn derbyn profiadau ymarferol ac yn cael amryw o gyfleoedd i ddatblygu drwy gael eich mentora gan arbenigwyr yn y maes. Bydd cyfleoedd datblygu parhaus ar gael i chi yn rhad ac am ddim er mwyn meithrin a datblygu eich sgiliau i sicrhau gyrfa hir a llwyddiannus o fewn gwasanaethau Gofal Cyngor Gwynedd.

Am fwy o fanylion am bob math o gyfleon yn y maes gofal, ewch i:

• Gwefan Gofalwn Cymru (yn agor mewn tab newydd)
• Safle facebook Gofalwn Gogledd Cymru (yn agor mewn tab newydd)

Neu, i weld yr holl swyddi sydd ar gael ar draws y sir gan wahanol ddarparwyr, ewch i:

• Gofalwn Cymru - swyddi (yn agor mewn tab newydd)