Buddsoddi i wella systemau Teledu Cylch Cyfyng yng Ngwynedd

Mae Cyngor Gwynedd wedi sicrhau grant o £456,000 gan y Gronfa Ffyniant Cyffredin (Shared Prosperity Fund) Llywodraeth y Deyrnas Unedig i wella diogelwch ac isadeiledd mewn trefi allweddol ar draws y sir.

Bydd y buddsoddiad yn sicrhau gwelliannau sylweddol i systemau teledu cylch cyfyng (TCC) ym Mhwllheli, Caernarfon a Bangor. Yn ogystal ag ychwanegu camerâu newydd mewn mannau o bryder, bydd y feddalwedd sy’n recordio yn cael ei huwchraddio i wella mynediad, gweithrediad ac effeithlonrwydd.

Mae’r gwaith hwn yn rhan o raglen ehangach Adfywio Canol Trefi Cyngor Gwynedd sy’n anelu at greu amgylcheddau trefol sy’n denu buddsoddiad, meithrin balchder cymunedol, ac annog bwrlwm economaidd.

Cefnogwyd y cais am deledu cylch cyfyng gan Heddlu Gogledd Cymru.  Dywedodd y Prif Arolygydd Stephen Pawson:

“Rydym yn parhau i weithio gydag asiantaethau partner i wneud Gwynedd yn ddiogel i bawb sy’n byw, yn gweithio ac yn ymweld.

“Bydd teledu cylch cyfyng ychwanegol yn atal ac yn canfod troseddau ac ymddygiad gwrthgymdeithasol yn ogystal â rhoi tawelwch meddwl i’n cymunedau.”

Disgwylir i’r gwelliannau arwain at:

• Ganfyddiad uwch o ddiogelwch ymhlith trigolion ac ymwelwyr
• Lleihad mewn troseddau cymdogaeth
• Gwell profiad o’r dref
• Gwell darpariaeth isadeiledd
• Gwell rheolaeth o’r amgylchedd adeiledig a thirweddol i ‘ddileu troseddau trwy ddylunio’

 Mae’r buddsoddiad hwn yn adlewyrchu ymrwymiad Cyngor Gwynedd i greu trefi lle mae pobl yn teimlo’n ddiogel, yn falch ac yn rhan o’u cymuned.

Ychwanegodd y Cynghorydd June Jones, Aelod Cabinet dros Priffyrdd, Peirianneg a Ymgynghoriaeth Gwynedd, Cyngor Gwynedd:

“Mae Gwynedd yn ardal groesawgar a diogel gyda chyfradd droseddu sydd ar y cyfan yn gymharol isel. Rydym wedi ymrwymo i gadw ein hardaloedd yn ddiogel, felly bydd cael y camerâu hyn, ynghyd â'n partneriaeth cryf gyda Heddlu Gogledd Cymru, yn ein helpu i atal troseddu ac ymddygiad gwrthgymdeithasol i’r dyfodol."