Sicrhau buddion i gymunedau Gwynedd ac Eryri trwy dwristiaeth gynaliadwy

Dyddiad: 26/11/2021

Mae Cyngor Gwynedd ac Awdurdod Parc Cenedlaethol Eryri wedi ymrwymo i gydweithio i sicrhau y bydd cymunedau’r ardal yn elwa o holl agweddau o’r economi ymweld.

Yr wythnos yma, mae’r ddau gorff wedi ffurfioli eu hymrwymiad trwy lofnodi Memorandwm o Ddealltwriaeth ar dwristiaeth gynaliadwy i’r dyfodol a fydd er budd a lles pobl, amgylchedd, iaith a diwylliant Gwynedd ac Eryri.

Daw hyn yn dilyn blynyddoedd o gydweithio ar y maes – cyn y pandemig ac yn ystod y cyfnod Covid. Bydd y partneriaid yn parhau i gydweithio ar yr agenda allweddol yma gan gynnal cynhadledd ddiwedd y mis i drafod y camau nesaf i wreiddio’r weledigaeth.

Meddai Arweinydd Cyngor Gwynedd, y Cynghorydd Dyfrig Siencyn:

“Mae’n rhaid fod unrhyw economi ymweld yn sicrhau fod pobl a chymunedau Gwynedd yn ganolog iddi a’u bod yn elwa o’r maes.

“Rwy’n falch iawn fod y Cyngor a’r Parc wedi cytuno ar weledigaeth ar y cyd ar gyfer twristiaeth gynaliadwy ar gyfer y dyfodol, gyda phwyslais arbennig ar ein hiaith, diwylliant a threftadaeth.

“Rydym am sicrhau fod yr economi ymweld er budd ein cymunedau ac yn gwarchod ein hamgylchedd a bywyd gwyllt, a’n bod yn sicrhau’r buddion mwyaf i gymunedau a busnesau Gwynedd.

“Mae’r deunaw mis diwethaf wedi amlygu’r angen i ni fel awdurdodau i barhau gyda’r cydweithio i sicrhau fod ein hardal yn elwa o dwristiaeth - a hynny ar ein telerau ni.

“Beth sy’n allweddol ydi’n bod yn gallu sicrhau twristiaeth sydd wirioneddol yn gynaliadwy ac nad ydi’r ardal ar ei cholled mewn unrhyw ffordd yn sgil yr economi ymweld. Rydym am weld pobl leol yn elwa ar swyddi da cynaliadwy yn y maes, a hynny trwy gydol y flwyddyn.”

Dywedodd y Cynghorydd Wyn Jones, Cadeirydd Awdurdod Parc Cenedlaethol Eryri:

“Mae’n hynod bwysig gweld Awdurdodau Lleol yn cydweithio ar gyfer gwarchod ein cymunedau drwy feithrin ein economi a busnesau lleol.

“Mi fydd y gwaith yma’n gwarchod y nodweddion craidd sy’n diffinio’r Parc Cenedlaethol trwy’r rhinweddau arbennig unigryw.

“Mae’r Awdurdod a Chyngor Gwynedd wedi ymrwymo i wneud y gorau dros y bobl sy’n byw ac yn gweithio yn yr ardal trwy hyrwyddo twristiaeth gynaladwy sydd hefyd yn ei dro yn mynd i fynd i’r afael ac effeithiau newid hinsawdd.”

Wrth fwrw ymlaen i wreiddio’r weledigaeth ar y cyd o economi ymweld gynaliadwy ar gyfer Gwynedd ac Eryri, mae’r awdurdodau yn cynnal cynhadledd rithiol ar 30 Tachwedd fydd yn croesawu cynrychiolwyr o gymunedau lleol, busnesau sy’n gweithio yn y maes ac arbenigwyr ar dwristiaeth cynaliadwy.

Bydd y gynhadledd yn cynnwys cyflwyniadau gan yr Athro Terry Stevens arbenigwr mewn twristiaeth rhyngwladol, ynghyd â chynrychiolydd o Ynys Aran i amlygu sut mae sicrhau cydbwysedd rhwng cymuned, amgylchedd a’r economi ymweld.