Datblygiadau tai cyntaf Cyngor Gwynedd i gartrefu pobl leol ar fin cwblhau

Dyddiad: 03/11/2021

Mae un o ddatblygiadau tai cyntaf Cyngor Gwynedd ers blynyddoedd lawer ar fin ei gwblhau, gyda’r gobaith y bydd y tenantiaid cyntaf yn symud i mewn cyn y Nadolig.

Mae’r cynllun arloesol ar gyfer cartrefi ecogyfeillgar yn ardal Segontium, Caernarfon yn agosáu at gwblhau. Bydd yr unedau yn defnyddio 90% yn llai o ynni na chartrefi traddodiadol.

Dywedodd y Cynghorydd Craig ab Iago, Aelod Cabinet Tai ac Eiddo Cyngor Gwynedd: “Dwi’n falch iawn o fod yn rhan o ddatblygiad y tai newydd yma.

“Hwn ydi cam cyntaf ein gweledigaeth i adeiladu tai modern, gwyrdd, diogel a fforddiadwy i gartrefu pobl ni yn eu cymunedau.

“Rydym yn wynebu argyfwng tai, ac rydym ni am wneud popeth o fewn ein gallu i gynyddu’r cyflenwad tai a chyfleoedd i bobl fyw yn eu cymunedau.

“Mae effaith yr argyfwng i’w weld mewn cymunedau ar draws Gwynedd ond rydan ni o ddifri am wneud gwahaniaeth er budd pobl y sir. Mae gweld ein gweledigaeth o fedru sicrhau bod gan bobl Gwynedd fynediad at gartref addas o safon, sy’n fforddiadwy ac sy’n gwella eu hansawdd bywyd yn cael ei wireddu drwy godi adeiladau fel hyn yn meddwl lot i mi.

“Mae’n ddyddiau cynnar y Cynllun Gweithredu Tai, ac nid yw adeiladau fel hyn yn cael eu codi dros nos, ond mae’n arwydd clir o’n hymrwymiad i sicrhau cartrefi i bobl y sir.”

Cafodd Cynllun Gweithredu Tai Cyngor Gwynedd gwerth £77 miliwn ei gymeradwyo gan y Cabinet ym mis Rhagfyr 2020 ac mae’n cael ei weithredu ers Ebrill 2021. Mae’n gynllun chwe blynedd sydd wedi ei lunio er mwyn ceisio cyfarch yr amcanion isod:

 

  • Neb yn ddigartref yng Ngwynedd
  • Tai cymdeithasol ar gael i bawb sydd angen un
  • Cartref pawb yng Ngwynedd yn fforddiadwy iddynt
  • Tai Gwynedd yn amgylcheddol gyfeillgar
  • Cartrefi yn cael dylanwad cadarnhaol ar iechyd a llesiant pobl Gwynedd.

 

Mae’r 33 o brosiectau a osodir yn y Cynllun Gweithredu Tai yn defnyddio nifer o ffynonellau i’w ariannu, gan gynnwys y premiwm treth Cyngor a osodir ar ail gartrefi, cyllideb cynllun asedau’r Cyngor, amrywiaeth o grantiau gan Lywodraeth Cymru a benthyca.

Bydd y pods ar safle hen adeilad Ysgol Pendalar yn ardal Segontium yng Nghaernarfon  yn cael eu cynnig i unigolion bregus o’r gymuned leol, a fydd yn derbyn cefnogaeth i fedru datblygu’r sgiliau er mwyn gallu byw yn annibynnol cyn symud ymlaen i denantiaethau eu hunain.

Mae’r dyluniad yn seiliedig ar egwyddorion ‘passivhaus’ a fydd yn golygu y bydd yr adeiladau’n creu eu hynni eu hunain, gan gadw costau’n isel i denantiaid.

Dywedodd Carys Fon Williams, Pennaeth Adran Tai ac Eiddo’r Cyngor: “Mae yna nifer o unigolion Gwynedd ar hyn o bryd yn byw mewn llety dros dro – y niferoedd uchaf yr ydym erioed wedi eu gweld yma yng Ngwynedd.

“Mae’r cynllun newydd yma yn cychwyn ni ar y daith o leoli’r unigolion hyn a rhoi’r cymorth iddyn nhw ar gyfer cynnal tenantiaethau i’r dyfodol.”