Cabinet Gwynedd yn buddsoddi dros £200,000 i hyrwyddo'r Gymraeg

Dyddiad: 01/12/2021
NiaJeffreys1

Mae Cabinet Cyngor Gwynedd wedi ymrwymo i fuddsoddi £203,880 yng ngwaith Hunaniaith – menter iaith y sir.

Bydd yr hwb ariannol yma yn galluogi’r fenter i benodi prif swyddog am gyfnod o bedair blynedd gyda’r disgwyliad y byddant yn dwysau’r gwaith o ddenu buddsoddiad ychwanegol fel y gellir cryfhau presenoldeb ymarferol staff Hunaniaith ar lawr gwlad yng nghymunedau’r sir.

Tra cytunwyd y dylai Hunaniaith barhau yn uned o fewn y Cyngor am y tro, bydd gwaith yn  bwrw ymlaen i’r fenter fod yn endid annibynnol yn y dyfodol.

Meddai’r Cynghorydd Nia Jeffreys, Aelod Cabinet Cefnogaeth Gorfforaethol Cyngor Gwynedd sy’n gyfrifol am yr iaith Gymraeg:

“Dros y blynyddoedd, mae polisïau a strategaethau iaith arloesol Gwynedd wedi amddiffyn ein cymunedau Cymraeg ac arwain y ffordd yn genedlaethol.

“Rydan ni am weld y gwaith yma yn parhau, ac yn awyddus i sicrhau fod y Gymraeg yn iaith wirioneddol gymunedol mewn ardaloedd ar hyd a lled Gwynedd. Mae gan Hunaniaith rôl bwysig i’w chwarae yn y gwaith yma ac rydw i’n falch iawn ein bod fel Cabinet am fuddsoddi £203,880 i gyflymu a dwysau’r gwaith yma.

“Byddwn yn penodi prif swyddog ar gyfer y fenter yn fuan a fydd yn gwella’r cyswllt cymunedol pwysig yma, ynghyd a gweithio ar ddenu cyllid allanol ychwanegol i gefnogi gwaith hybu’r Gymraeg yng Ngwynedd.

“Mae hyn yn gychwyn cyfnod newydd cyffrous i’r Gymraeg fel iaith gymunedol yng Ngwynedd. Ein nod fydd gweld Hunaniaith fel endid annibynnol grymus a fydd yn fenter lle bydd perthynas glos gyda chymunedau ar hyd a lled y sir yn y dyfodol.”

Mae’r buddsoddiad newydd yma hefyd wedi ei groesawu gan Dafydd Iwan, Cadeirydd Grŵp Strategol Hunaniaith.

Meddai: “Mae pawb am weld Hunaniaith yn parhau i wneud cyfraniad cadarnhaol dros yr iaith Gymraeg mewn cymunedau ar draws Gwynedd.

“Mae penderfyniad Cabinet y Cyngor yn benllanw dros flwyddyn o waith i adnabod y ffordd orau o alluogi Hunaniaith i ryddhau potensial di-bendraw y Gymraeg yng Ngwynedd.

“Gyda chyllid newydd yn ei le, bydd modd i’r fenter symud i’r wedd nesaf fydd yn golygu dwysau’r gefnogaeth fydd ar gael i hybu a chynyddu defnydd o’r Gymraeg ym mhob cornel o’r sir, ac yn arbennig felly yn yr ardaloedd lle mae trai ieithyddol wedi bod.”

Yng nghyfarfod Cabinet y Cyngor ar 30 Tachwedd, ymrwymwyd i fuddsoddi £203,880 ychwanegol er mwyn hybu a hyrwyddo’r Gymraeg yng nghymunedau Gwynedd.

Mae gan Gyngor Gwynedd hanes hir o hybu a gwarchod yr iaith a fe roddir lle amlwg i’r Gymraeg yn nghynlluniau strategol y Cyngor. Mae’r buddsoddiad ychwanegol yma yn gysylltiedig gyda strategaeth iaith y Cyngor sef Cynllun Hybu’r Gymraeg yng Ngwynedd 2018-2023 ac yn rhoi sylw i faes blaenoriaeth 4 – iaith y gymuned.