Croesawu'r cwsmer yn ddiogel yng Ngwynedd

Dyddiad: 11/05/2021
Stori

Yn ystod y cyfnod clo, mae Cyngor Gwynedd a busnesau’r sir wedi bod yn cydweithio er mwyn paratoi i groesawu cwsmeriaid yn ddiogel yn ôl i’n Strydoedd Fawr fel mae’r cyfyngiadau yn llacio.

Mae Cyngor Gwynedd wedi sicrhau cyllid gan Lywodraeth Cymru er mwyn sefydlu cronfa grant Croesawu’r Cwsmer yn Ddiogel ar gyfer prynu offer allanol i fusnesau canol trefi ym mhrif ganolfannau’r Sir. 

Derbyniwyd 56 o geisiadau o 18 o drefi ar draws Gwynedd, ac mae cyfanswm y gronfa dros £125,000 gyda dros £88,000 o gyllid grant wedi ei ddyrannu i’r busnesau. Ariannwyd trwy’r Gronfa Trawsnewid Trefi Thematig Covid-19 Ymateb Gogledd Cymru 20/21.

Meddai’r Cynghorydd Gareth Thomas, Aelod Cabinet Cyngor Gwynedd dros Datblygu’r Economi:

“Mae’r misoedd diwethaf wedi bod yn rhai heriol iawn i fusnesau Gwynedd ac rydym yn ddiolchgar iddynt am y gwaith maen nhw wedi bod yn ei wneud dros y flwyddyn ddiwethaf i helpu i gadw eu cwsmeriaid yn ddiogel.

“Mae busnesau ar draws y sir wedi meddwl am ddulliau arloesol i fedru sicrhau diogelwch eu cwsmeriaid gan cynnwys gofod eistedd tu allan o ddeunyddiau ailgylchu, canopïau, gwresogyddion a dodrefn allanol.

“Er fod angen parhau i gymryd pwyll a dilyn y rheolau diogelwch, rydym yn gobeithio y bydd trigolion Gwynedd a phobl sy’n ymweld â’r sir yn gweld budd o’r buddsoddiad sydd wedi digwydd yn siopau a busnesau’r stryd fawr.”

Dywedodd Nicola Griffith, Rheolwr Cyffredinol Gwesty’r Celt yng Nghaernarfon:

“Ddaru ni neud cais am y grant cadw'r cwsmer yn ddiogel gan Gyngor Gwynedd. Roeddwn wedi fy mhlesio gydag effeithlonrwydd a chymorth yr holl bobl nes i ddelio efo nhw. Mae ein hardal y tu allan yn barod gyda dodrefn newydd, ac mae’n edrych yn anhygoel!”

Mae Stori Beer & Wine Cyf yn Y Bala wedi sicrhau trwydded i ddefnyddio’r gofod parcio tu allan i’r Siop ar gyfer gweini, ac wedi cael offer trwy’r gronfa er mwyn sicrhau diogelwch eu cwsmeriaid, dywedodd Fiona Hopkins, perchennog y busnes: 

“Mae'r flwyddyn ddiwethaf wedi bod yn anodd iawn i bawb ac fel busnes sy'n dibynnu ar dwristiaeth ac incwm o'n bar rydym ni hefyd wedi ei chael hi’n anodd. Nid oeddem wedi ystyried yfed y tu allan tan y llynedd, ond cawsom ein hannog i wneud cais am drwydded palmant a sicrhau hynny.

“Roeddem mor ddiolchgar am y broses gyflym a’r gefnogaeth gan Gyngor Gwynedd a’r Awdurdod Priffyrdd, ac fe gafodd yr ardal y tu allan gefnogaeth dda iawn gan y gymuned leol. Felly ddaru ni benderfynu eleni i fuddsoddi mewn dodrefn awyr agored iawn (llynedd ddaru ni ddefnyddio ein cadeiriau a'n byrddau arferol) a sgriniau a phlanwyr, ac roeddem yn ffodus i sicrhau grant tuag at hyn gan y gronfa 'Croesawu'r Cwsmer yn Ddiogel’.

“Rydym yn barod! Mae'r planwyr eisoes yn denu sylwadau cadarnhaol gan ein cymuned hyfryd, ac rydym yn teimlo y bydd y gofod allanol newydd yn helpu ein busnes i adfer. Rydym yn wirioneddol ddiolchgar."

Am fwy o wybodaeth am y gefnogaeth sydd ar gael i fusnesau yng Ngwynedd, ewch i

www.gwynedd.llyw.cymru/busnes

 

LLUNIAU:

1 – Fe wnaeth Fiona Hopkins, perchennog Stori Beer & Wine Cyf yn Bala sicrhau arian i ddiogelu cwsmeriaid sy’n ymweld a’r busnes.

2 – Sicrhaodd gwesty’r Celt yng Nghaernarfon gefnogaeth i helpu i ariannu ardal tu allan ar ei newydd-wedd