Triawd y traethau yn dweud "Byddwch yn ofalus ar lan y môr!"

Dyddiad: 30/07/2021
Diogelwch Traeth

Mae tri o greaduriaid y môr yn rhoi help llaw i Gyngor Gwynedd i ddysgu plant lleol o’r ffordd orau o fwynhau ein glannau môr prydferth yn ddiogel.

Ar ôl cael eu darganfod ar draethau Gwynedd cyn ddiwedd y tymor bu Dewi y Dolffin, Seren y Seren Fôr ac Olwen yr Octopws am dro i rai o ysgolion cynradd y sir i siarad efo’r plant.

Yn ystod eu hymweliadau i Ysgol Treferthyr yng Nghricieth; Ysgol Nefyn ac Ysgol y Traeth yn Abermaw cafodd y plant gyfle i sôn am yr hyn roeddent yn fwynhau ei wneud ar lan y môr ac hefyd i ddysgu sut i gadw’n ddiogel yn y dŵr ac ar y traeth.

Rhai o’r pethau ddysgodd y plant oedd:

 

  • Mae’r llanw a’r cerrynt yn gallu bod yn beryglus;
  • Os oes baner goch yn chwifio ar y traeth mae’n rhy beryglus i fynd i’r dŵr;
  • Mae’n bwysig cadw’n agos at eu teulu neu ffrindiau – peidiwch a chrwydro ar ben eich hunain;
  • Os oes arwyddion ar y traeth, gwnewch yn siŵr eich bod chi a’r oedolion sy’n edrych ar eich hôl yn eu darllen;
  • Os ydych yn gweld rhywun mewn trafferth yn y dŵr dywedwch wrth oedolyn, er enghraifft pwy bynnag sy’n edrych ar eich hol neu’r warden traeth. Efallai byddan nhw yn ffonio 999 ac yn gofyn am Gwylwyr y Glannau.

 

Dywedodd Barry Davies, Rheolwr Gwasanaeth Morwrol Cyngor Gwynedd: “Dwi’n ofnadwy o ddiolchgar o’r croeso arbennig a gafodd Dewi, Seren, Olwen a minnau gan y plant i gyd.

“Dros doriad yr haf, dwi’n siŵr bydd rhan fwyaf o’r plant yn cael mynd i lan-y-môr, ac wrth gwrs bydd llawer o blant bach o ardaloedd eraill yn dod yma ar eu gwyliau ac yn cael ymweld a’n traethau. Mae dau beth yn bwysig wrth inni feddwl am hyn – yn gyntaf fod y plant yn cael hwyl ac yn mwynhau popeth sydd gan ein traethau hyfryd i’w cynnig; ond yn ail eu bod yn cadw’n ddiogel ac yn mynd adra yn saff ar ddiwedd y dydd.

“Rydw i’n edrych ymlaen at gael cwmni Seren, Dewi ac Olwen dros yr wythnosau nesaf o gwmpas glannau môr Gwynedd. Mi fyddan nhw yn ymweld a’n traethau mwyaf poblogaidd er mwyn siarad efo mwy o blant a dysgu iddyn nhw sut i gadw’n ddiogel. Os ydi plant a rhieni yn gweld y triawd, peidiwch bod yn swil, plîs dewch draw i ddweud ‘helo’ ac i hun-lun.”

Os ydy rhieni yn postio lluniau ar gyfryngau cymdeithasol, cofiwch gynnwys @CyngorGwynedd ar Twitter neu @CyngorGwyneddCouncil ar Facebook ac Instagram fel y gall y Cyngor hoffi a rhannu. Bydd Seren, Dewi ac Olwen wrth eu bodd gweld eu lluniau.

Yn ystod y sesiynau yn y dair ysgol, cafodd y plant y swydd bwysig o rhoi enwi’r tri creadur môr. Ac am wneud y gwaith cystal, cawsant i gyd sticer i gofio am y diwrnod a cherdyn post i’w atgoffa sut i gadw’n ddiogel. Bydd gan Dewi, Seren ac Olwen fwy o’r sticeri a’r cardiau post i’w rhoi i blant eraill yn ystod eu dyddiau ar draethau’r sir.

Ychwanegodd y Cynghorydd Gareth Thomas, Aelod Cabinet Cyngor Gwynedd dros economi: “Mae traethau Gwynedd yn lefydd braf a rydan ni eisiau i bawb fwynhau eu hunain yma. Ond rydym eisiau i bobl a phlant fod yn ymwybodol o’r peryglon. Yn enwedig wrth i fwy ohonom dreulio ein hamser hamdden yn agosach i gartref, ac efallai ddim mewn canolfannau gwyliau masnachol, oherwydd sefyllfa barhaus Covid-19.

“Er ein bod ar garreg ein drws ein hunain, mae’n bwysig peidio gadael ein gwyliadwriaeth i lawr a phob amser barchu’r môr a’r twyni tywod.

“Gyda help triawd y traethau byddwn yn sicrhau fod y neges bwysig yma yn cyrraedd cymaint â sy’n bosib o deuluoedd Gwynedd a thu hwnt yr haf yma.”

Mae fideo o driawd y traethau ym ymweld ag Ysgol Treferthyr ar gael yma, bydd mwy o fideos ar gael ar gyfryngau cymdeithasol Cyngor Gwynedd yn fuan, cadwch lygaid amdanynt.